الفاجومى بخير .. أحمدك يا رب

الحمد لله الفاجومى خرج من الأنعاش و الحمد لله حالته كويسة

.

بالنسبالى الموضوع كان مختلف قوى لانى عمرى ما زرت حد أبدا فى المستشفى ، و تقريبا بهرب من كل الزيارات دى مهما كانت صلة قرابتى بالمريض

.

الخبر جالى على الموبيل فى رسالة قصيرة من أحد الأصدقاء و قريتها لما صحيت من النوم على طول، الرسالة كانت مستفزة جدا و كلامها يخض ماحستش بنفسى الا و انا بجرى ورى تاكسى علشان يقف و لما واحد وقف اكتشفت ان الناس كلها كانت بتتفرج عليا و انا بعيط

.

احاول الاتصال بنوارة مش بترد و دة كان كفيل ان جرعة العياط تزيد و سواق التاكس يحاول تجنب ان عينه تيجى فى عينى فى المراية الامامية علشان ما يحسسنيش بالاحراج ، اقفل الموبيل بعد محاولة اتصال فاشلة تانيه بنوارة ابص فى تاريخ اليوم النهاردة اربعة تسعة يعنى فاضل على تاريخ موت جيفارا خمس ايام بس

.

مجرد الربط بين التاريخين و تكوين الشحصيتين مرعبة كفاية لواحد رايح لمريض فى الانعاش المفترض انه اول حد هايزوره فى المستشفى فى حياته ، بعد ربع ساعة كنت باتمشى فى المستشفى بين المكاتب و الاقسام لحد ما وصلت انه بيعمل اشعة ، اتصل بزينب اصغر بناته لتخبرنى انها فى الطريق ، نصف ساعة انتظر خروجه و بتابع ردود افعال الناس بعد معرفتهم ان اللى بيعمل اشعه هو نجم

.

يخرج من الغرفة لنستقبله ، الغريب ان موضوع انى بخاف منه دة رجع تانى و خصوصا و هوه خارج من الاوضة ، يرفع عينه فى عينى و يقول واد يا جمال ايه اللى جابنى هنا و ايه اللى جاب الاشكال الوسخة هنا مشيرا لأصدقاء زينب

.

ساعتها بصراحة كنت عايز اصرخله ويلكووووووم باك يا نجم ، نمشى شويه علشان يوزع سلامات على الناس ، ننتقل لقسم تانى و اشعة تانى علشان يتأخر قوى و شويه شويه طلع صوت الدكاترة مسخسخين ضحك ، ينقل لغرفته تانى لان معاد الزيارة بدأ انتظر زينب علان ابدل معاها و ادخل انا الممرضة تقولى انت ابنه صح ؟ فقلتلها حاجة زى كدة و لربع ساعة قاعد افكر الحاجة اللى زى كدة دى تطلع ايه ، خبرتى مع مسمى غرفة الانعاش لا يتعدى المسلسلات و الافلام العربية ادخل الاقيه خلاص نام

.

نوارة و فاصل العياط المتواصل بصراحة من كتر ما شوفت نوارة بتعيط زهفت مرة ابوها مش عارف بحكليه على ايه راح قايلى البت نوارة بت فقرية اصلا و غاوية عياط

.

الحمد لله و ربنا يقومهولنا بالسلامة